पोखरा। जेठ ११ गते
पोखरामा मेलमिलापकर्ताहरूका लागि मेलमिलाप सम्बन्धी आधारभूत तालिम सुरु भएको छ । पोखरा महानगरपालिका न्यायिक समितिको आयोजना तथा सामुदायिक मेलमिलापकर्ता समाजको सहजिकरणमा सुरु तालिमको नगरप्रमुख धनराज आचार्यले शुभारम्भ गर्नुभएको हो ।
तालिमको शुभारम्भ गर्दै नगरप्रमुख आचार्यले सामाजिक अनुशासन र मर्यादा कायम राख्न मेलमिलाप नै महत्त्वपूर्ण हुने बताउनुभयो । वार्ता र शालीन संवादको माध्यमबाट सामाजिक एकता, शान्ति र अनुशासन कायम राख्दै भयमुक्त वातावरण तयार गर्न सकिने उहाँले बताउनुभयो । संसारमा भएका भयानक युद्धहरू समेत वार्ता र छलफलको माध्यमले मेलमिलाप र समझदारीमा गएर टुङ्गिएको दृष्टान्त उल्लेख गर्दै उहाँले सामाजिक रूपमा देखिने कुनै पनि प्रकारका विवादहरूको समाधानमा मेलमिलापकर्ताले खेल्ने भूमिका निष्पक्ष र न्यायोचित हुनुपर्ने बताउनुभयो ।
न्यायिक समिति संयोजक एवम् उपप्रमुख मन्जुदेवी गुरुङले अदालत, अख्तियार र अस्पताल सकेसम्म जान नपर्ने अवस्थाको सृजना गर्नुपर्नेमा जोड दिनुभयो । मानिसहरूले सास्ती खेप्नु पर्ने यस्ता झन्झटिला प्रक्रिया र अवस्थाहरूको सामना गर्न नपर्ने गरी सामाजिक मेलमिलाप र अनुशासन कायम गर्न इमानदार हुनुपर्ने बताउनुभयो । आफूहरू सहिष्णु महानगरपालिका निर्माणको अभियानमा रहेको बताउनुभयो । महानगरमा आउने विवादहरूलाई शान्तिपूर्ण र न्यायोचित ढङ्गले समाधान गर्ने प्रयत्न गर्ने गरिएको उहाँले बताउनुभयो ।
कार्यक्रममा पोखरा महानगरपालिकाका प्रवक्ता मोतीलाल तिम्सिना, वडा नम्बर १७ की वडाध्यक्ष राधिका कुमारी शाही योगी, न्यायिक समिति सदस्य रजनी परियार, कालिदास पोखरेल, कानुन अधिकृत नारायणप्रसाद शर्मा र मेलमिलापकर्ता संयोजक सोम लम्साल लगायतले विवादहरूको समाधानमा मेलमिलापकर्ताको भूमिकाका बारे बोलेका थिए ।
१७ ज्येष्ठसम्म सञ्चालन हुने तालिममा ३३ जना प्रशिक्षार्थीहरूको सहभागिता रहेको छ ।
यो खबर पढेर तपाईलाई कस्तो महसुस भयो ?
+1
+1
+1
+1
+1
