युवा, श्रम तथा रोजगार मन्त्री रामजी यादवज्यूको अध्यक्षतामा साउन १४ गते आर्थिक वर्ष २०८२/०८३ को वार्षिक प्रगति समीक्षा तथा मन्त्रालय स्तरीय विकास समस्या समाधान समिति (MDAC) को बैठक भव्यताका साथ सम्पन्न भएको छ

बैठकमा मन्त्रालय तथा मातहतका निकायहरूले गत आर्थिक वर्षमा गरेका कामहरूको समीक्षा गर्दै आगामी दिनमा सेवा प्रवाहलाई थप चुस्त र प्रभावकारी बनाउन माननीय मन्त्री यादवले मन्त्रालय अन्तरगतका विभाग, बोर्ड लगायतका निकायहरूलाई निर्देशन दिनुभएको छ।

माननीय मन्त्री यादवले यस आर्थिक वर्षभित्र प्रत्यक्ष र अप्रत्यक्ष गरी १ लाख रोजगारी सिर्जना गर्ने ‘माइल स्टोन’ हासिल गर्न कुनै कसर बाँकी नराख्ने गरी काम अघि बढाउन, वैदेशिक रोजगार विभागमा प्राप्त हुने गुनासोहरूलाई ‘इमर्जेन्सी’, ‘हाई प्रायोरिटी’ र ‘नर्मल’ गरी वर्गीकरण गरी सोही अनुसार तत्काल सम्बोधन गर्ने व्यवस्था मिलाउन, ७५३ वटै स्थानीय तहबाट श्रम स्वीकृतिको सहजीकरणको लागि युजर आइडी र पासवर्ड वितरण गरी कार्यान्वयनमा ल्याउन, विदेशमा रहेका श्रमिकहरूका लागि २४/७ टेलिमेडिसिन सेवा र ‘श्रमदान कल सेन्टर’ लाई थप प्रभावकारी बनाउन, श्रमिकका समस्या र दुःखमा मन्त्रालय ‘ रियाक्टिभ’ होइन, ‘प्रो-एक्टिभ’ भएर लाग्न निर्देशन दिनुभएको हो।

माननीय मन्त्री यादवले मन्त्रालयका कर्मचारीहरूले दैनिक कार्य सम्पादनको ‘टाइम सिट’ अनिवार्य भर्ने प्रणाली समेत लागू गर्न निर्देशन दिँदै भन्नुभयो “हामीले गरेका नीतिगत निर्णय र कार्यक्रमहरूले नागरिकको जीवनमा प्रत्यक्ष परिवर्तन ल्याउनुपर्छ। हरेक कामको स्पष्ट कार्य योजना बनाई जिम्मेवार भएर नतिजा निकाल्न म सबैलाई आग्रह गर्दछु।”

कार्यक्रममा प्रधानमन्त्री तथा मन्त्रिपरिषद्को कार्यालय, अर्थ मन्त्रालय, भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालय, राष्ट्रिय योजना आयोग, राष्ट्रिय युवा परिषद् लगायतबाट प्रतिनीधीहरुकाे उपस्थिति थियो।स्रोत: युवा, श्रम तथा रोजगार मन्त्रालय